Тырышлыҡ күрһәт кенә!

Өфөлә Башҡорт дәүләт университетында “Мин – профессионал” олимпиадаһы проекты етәксеһе, Юғары иҡтисад мәктәбе проректоры Валерия Касамара юғары уҡыу йорттары студенттарына лекция уҡыны.

Был проекттың маҡсаты – төрлө йүнәлештә белем алған һәләтле студенттарға илдең алдынғы уҡыу йорттарында уҡыуын дауам итергә һәм ҙур компанияла эш башларға булышлыҡ итеү, йәғни йәштәргә карьера төҙөргә ярҙамлашыу. Проекттың ойоштороусылары – илдең 26 юғары уҡыу йорто һәм ҙур компаниялары, шул иҫәптән “Росатом”, Һаҡлыҡ банкы, ВТБ-банк, Яндекс һәм башҡалар.

Өсөнсө тапҡыр уҙғарылған был олимпиадала кемдәр ҡатнаша аламы? Теләге булған бөтә юғары уҡыу йорттары студенттары ла. Тәүҙә 18 ноябргәсә yandex.ru/profi сайтында теркәлеү үтергә, 68-ҙән бер йәки бер нисә йүнәлеш һайларға кәрәк. Ә 22 ноябрҙән 8 декабргәсә онлайн һайлап алыу этабында ҡатнашыу мотлаҡ. 2020 йылдың ғинуар-мартында иһә шәхсән рәүештә һуңғы этап һынауҙарын үтергә тура киләсәк.

Киләһе йылдың ғинуар-февралендә ҡатнашыусылар Рәсәйҙең бер нисә ҡалаһындағы 18 ҡышҡы мәктәптә ойоштороласаҡ белем биреү форумдарына бара ала. Бының өсөн өҫтәмә һайлау буласаҡ. Унда төрлө тренингтарҙа, бәхәс майҙансыҡтарында үҙеңде күрһәтеү мөмкинлеге тыуасаҡ. Абруйлы эксперттар, эшҡыуарҙар, топ-менеджерҙар лекциялар уҡыясаҡ, оҫталыҡ дәрестәре бирәсәк. Буласаҡ һөнәреңдең нескәлектәре тураһында төплө яуаптар алырға була. Ҡышҡы мәктәпкә ғаризаны 8 декабргәсә бирергә мөмкин.

Олимпиадаға ҡыҙыҡһыныу артҡандан-арта. Элекке йыл унда 295 мең ғариза килһә, былтыр инде - 523 мең. Быйыл башҡортостандар ҙа был проектҡа дәррәү ҡушылыр, тип өмөтләнәбеҙ.

Әйткәндәй, былтырғы йомғаҡтарҙан күренеүенсә, республикабыҙ дипломанттар һаны буйынса иң яҡшы ун төбәк иҫәбенә индерелгән. Проектта ҡатнашыу бушлай.

фото/яндекс