Республикала йәшәүселәрҙе «Быуаттар аша көмөш тәңкәләр сыңы» фотопроектында ҡатнашырға саҡыралар

Башҡортостанда йәшәүселәрҙе «Быуаттар аша көмөш тәңкәләр сыңы» фотопроектында ҡатнашырға саҡыралар. Ҡатнашыу өсөн өләсәй-олатайҙарығыҙҙың йәки башҡа туғандарығыҙҙың милли кейемдә төшкән элекке фотолары булырға тейеш.

Проектты ойоштороусылар уларҙыҡына оҡшаш костюмдар табырға һәм проектта ҡатнашыусылар өсөн фотосессия үткәрергә вәғәҙәләй. Фотоларҙы унда һүрәтләнгән кешеләр тураһында ҡыҫҡаса мәғлүмәт менән Башҡортостандың Милли китапханаһындағы күргәҙмәгә ҡуйыу күҙаллана.

«Беҙҙең өсөн быуындар бәйләнешенең булыуы мөһим, кешеләр ғаилә альбомдарына күҙ һалһын ине, — ти проекттың идея авторы — Милли китапхана директоры Айгөл Моратова. — Беҙҙә бер нисә фотоһүрәт бар. Үҙемдең альбомымда ла әсәйем яғынан өләсәйемдең, математика уҡытыусыһы Шәкүрова Хәбирә Миңғәзиз ҡыҙының фотоһы һаҡланған. Ул 1917 йылда тыуған, 2006 йылда, 89 йәшендә арабыҙҙан китте. Өс ҡыҙ һәм ул тәрбиәләп үҫтергән, туғыҙ ейән-ейәнсәре бар. Әҙәбиәт институтына уҡырға инеүем менән уға рәхмәтлемен. Беренсе фотола — нәнәйем, икенсеһендә мин».

Проекттың исемен Зөһрә Бураҡаева уйлап тапҡан. Күргәҙмә өсөн 20-гә яҡын герой йыйыу күҙаллана. Фотоһүрәттәр һәм ҡыҫҡаса мәғлүмәттәр яҙылған хаттарҙы «Быуаттар аша көмөш тәңкәләр сыңы» фотопроекты» тигән билдә менән [email protected] почтаһына ебәрергә мөмкин.