Ял көндәрендә республикала ҡар яуыуы көтөлә

Ял көндәрендә Башҡортостанда ҡар яуа, тип вәғәҙәләй Башгидромет синоптиктары.

Алдағы көндәрҙә республикала һауа торошон атмосфера фронты билдәләй. Шәмбе, 6 октябрҙә, һалҡын фронт аша төбәк биләмәһенә арктик һауа үтеп инә. Көндөҙ температура +4,+9 градустан күтәрелмәй. Республиканың айырым райондарында бер аҙ ямғыр һәм ҡар ҡатыш ямғыр яуыуы ла мөмкин.

7 октябргә ҡарай төндөң дә һалҡын булыуы, һауа температураһының -3,+2 градусҡаса түбәнәйеүе көтөлә. Урыны менән бер аҙ ҡар ҡатыш ямғыр яуа.

Хәл йәкшәмбе көндө үҙгәрә башлай. Көнбайыштан республика биләмәһенә йылы һауа массаһы күсә. Һауа температураһы +8,+13 градусҡа тиклем күтәрелә. Республиканың күпселек райондарында ямғыр яуа. Аҙнаның башы ял көндәренә ҡарағанда йылыраҡ булыуы, һауа температураһының +11,+16 градусҡаса күтәрелеүе күҙаллана.

http://bashgazet.ru/obshestvo/32104-jal-kndrend-respublikala-ar-jauauy-ktl.html