Башҡортостанда оло йәштәге 796 меңдән ашыу кеше йәшәй

ӨФӨ, 2018 йыл, 1 октябрь. /«Башинформ» мәғлүмәт агентлығы, Ғәлиә Нәбиева/.

Башҡортостанда 796 меңдән ашыу оло кеше йәшәй. Улар – 60 йәшлектәр һәм унан өлкәндәр. Шуларҙың 543 меңе – 60-74 йәшлектәр, 238 меңе – 75-89 йәшлектәр, һәм 15 мең кеше – оҙаҡ йәшәүселәр (90 йәш һәм өлкәнерәк). Башҡортостанстат Берләшкән Милләттәр Ойошмаһының Генераль Ассамблеяһы ҡарары буйынса 1991 йылдың 1 октябренән билдәләнгән Халыҡ-ара ололар көнөнә ҡарата өлкән йәштәгеләрҙе иҫәпләп сығарҙы.

Рәсәй Федерацияһы Юғары Советы Президиумының 1992 йылдың 1 июнендәге «Оло йәштәге кешеләрҙең проблемалары тураһында» ҡарары нигеҙендә илебеҙҙә лә Ололар көнө 1 октябрҙә билдәләнә. Байрамдың маҡсаты — өлкән йәштәге кешеләрҙең проблемаларына йәмәғәтселектең иғтибарын йәлеп итеү.

Бөтә донъя һаулыҡ һаҡлау ойошмаһы классификацияһына ярашлы, 60-74 йәшлектәр – ололар, 75-89 йәшлектәр — ҡарттар, 90 йәштәгеләр һәм унан өлкәнерәктәр — оҙон ғүмерлеләр. Берләшкән Милләттәр Ойошмаһы һәм Халыҡ-ара хеҙмәт ойошмаһы документтарына ярашлы, 60 һәм унан өлкән йәштәгеләр оло тип иҫәпләнә.