Башҡортостан башлығы грантына 185 проект дәғүә итә

Республиканың дәүләт телдәрен һәм Башҡортостан халыҡтары телдәрен һаҡлауға һәм үҫтереүгә йүнәлтелгән Башҡортостан башлығы гранттарына дәғүә итеүгә һайлап алыуҙы 185 проект уңышлы үтте. Улар араһында — мәҙәниәт, мәғариф, спорт һәм йәштәр сәйәсәте, киң мәғлүмәт саралары, фән өлкәһендәге проекттар.

Башҡортостан Мәҙәниәт министрлығына бөтәһе 325 ғариза килде. 31 июлдә – 1 августа Өфөлә Рафаил Шафиҡов рәйеслегендә Эксперт советы ултырышы булды. Совет һәр проектты гранттар тапшырыу тураһында тәртипкә тап килеү-килмәүен ҡараны. Совет ағазаларының конкурс материалдарын ҡарауы барышында 140 проект кире ҡағылды.

Һайлап алыуҙы үткән проекттар Башҡортостан Хөкүмәте вице-премьеры Салауат Сәғитов етәкселегендәге конкурс комиссияһына тапшырыла. Комиссия ултырышы август уртаһында уҙа.

Үҙеңдең ғаризаңдың торошо тураһында Башҡортостан Мәҙәниәт министрлығы сайтында белергә мөмкин.