1 майҙан Башҡортостанда электричкаларҙа йөрөү ҡиммәтләнә

«2018 йылдың 1 майынан электричкаларҙа йөрөүгә 21 һум һәм 10-сы саҡрымдан һуң артабанғы һәр саҡрым өсөн 2,1 һум күләмендә сикке хаҡ билдәләнә. 2016 йылда ул 19 һум күләмендә билдәләнгәйне», — тип хәбәр итте республика Хөкүмәте ултырышында Башҡортостандың Транспорт буйынса дәүләт комитеты рәйесе Тимур Мөхәмәтйәнов.

Мәҫәлән, Өфө — Шишмә маршруты буйынса юл хаҡы ғәмәлдәге 80 һумдан 1 майҙа 88 һумғаса күтәрелә.

Шул уҡ ваҡытта хәҙер оҡшаш автобус маршрутында бындай йөрөү пассажирға 120 һумға төшә.

Республика буйынса бөтәһе 85 ҡала яны электричкаһы йөрөй һәм уларға ихтыяж даими үҫә, тип билдәләнеләр Хөкүмәттең матбуғат хеҙмәтендә.

«Электричкаларҙың льготалы пассажирҙар категорияларына ташламалар артабан да һаҡлана», — тип асыҡлыҡ индерҙе Башҡортостан Хөкүмәте Премьер-министры Рөстәм Мәрҙәнов.