Дауаханала табиптар етешмәй

Раевка үҙәк район дауаханаһы баш табибы Наил Зыязетдинов студенттарҙы социаль яҡлау саралары менән таныштырҙы. Иң элек, йәш белгестәр, ауылда биш йыл эшләгәндән һуң, “Земство докторы” программаһы буйынса миллион һум аҡса ала ала. Кәрәк тип табылһа, улар өҫтәмә ҡатнаш һөнәрҙәргә уҡый. Йорт төҙөүгә ер участкалары бүленә, субсидиялар бирелә, торлаҡ наймы буйынса компенсация түләнә, бынан тыш, район хакимиәте һәм медицина хеҙмәткәре араһында хеҙмәт наймы килешеүе буйынса торлаҡ бүленә. Йәш белгестәргә өс йыл дауамында ай һайын окладҡа 5 процентлы өҫтәмә түләнә. Шулай уҡ коммуналь хеҙмәттәргә түләүҙә, балалар баҡсаларына урын биреүҙә лә льготалар бар.

Һуңғы туғыҙ йылда районға “Земство докторы” программаһы буйынса 43 табип килде, шуларҙың 29-ы дауаханала ҡалды. Былтыр ун табипҡа ошо программа сиктәрендә миллион һумға һумға сертификат тапшырылды. Ә “Земство фельдшеры” программаһы буйынса Красный Клин һәм Зеленый Клин фельдшер-акушерлыҡ пунктарынан ике йәш белгескә, шулай уҡ ашығыс ярҙам фельдшерына 500 мең һум бирелде.

Шулай булыуға ҡарамаҫтан, Раевка үҙәк район дауаханаһында табиптар етешмәй. Бөгөн анестезиолог-реаниматолог, эндокринолог, инфекционист, невролог, хирург, офтальмолог, өс стоматолог, стоматолог-хирург, психиатр, психиатр-нарколог, кардиолог, балалар хирургы, поликлиникаға ике участка терапевы һәм Никифар врачлыҡ амбулаторияһына бер терапевт талап ителә. Фельдшер-акушерлыҡ пункттарына алты фельдшер кәрәк.

- Дауаханаға “Земство докторы” программаһы буйынса медицина кадрҙарын йәлеп итеү дауам итә. Медицина юғары уҡыу йорттары һәм колледждары студенттары менән осрашыуҙар ойошторола. Мәктәп тамамлаусыларға маҡсатлы йүнәлтмәләр бүленә. Быйыл маҡсатлы ординатураны тамамлағандан һуң беҙгә өс белгес: хирург, терапевт һәм инфекционист эшкә киләсәк.

Ә әлегә күрше райондарҙың махсус белгестәрҙе йәлеп итәбеҙ. Мәҫәлән, беҙҙә офтальмолог, невролог һәм эндокринолог беҙгә килеп эшләй, - тип билдәләне райондың баш табибы Наил Зыязетдинов.

Хәл, ысынлап та, ҡатмарлы, табиптар етешмәй, шуға ла бөгөн дауаханала эшләүселәргә бик күп көс һалырға тура килә. Район һәм дауахана етәкселеге белгестәрҙе йәлеп итеп, уларға социаль һәм көнкүреш планында эшкә урынлашырға ярҙам итә. Һәм быйылғы осрашыу ҙа ошо проблеманы хәл итеүгә бер аҙым булды.

Автор фотоһы.