Әлшәй хәбәрҙәре
-19 °С
Болотло
75 лет Победы
Бөтә яңылыҡтар
Сәләмәтлек
8 Октябрь 2018, 18:36

Һаҡланғанға көҙ ҙә йылмайыр

Көҙгө һауа торошо, тәбиғәттең моңһоулығы күптәргә насар тәьҫир итеүсән.

Был хәлдән ҡотолоуҙың бер юлы – тән һәм йән сәләмәтлегенә ыңғай йоғонто яһаған йәшелсә-емеш менән туҡланыу. Уларҙың күбеһе сирҙәрҙе иҫкәртеп кенә ҡалмай, дауалай ҙа.


Мәҫәлән, банан. Был туҡ­лыҡ­лы емештең 75 процентын һыу, ҡалған өлөшөн аҡһым, май, калий, углеводтар тәшкил итә. Банан – күп ауырыуҙан дауа. Ул айырыуса тән температураһы күтәрелгәндә, ашҡаҙан эшмәкәр­леге боҙолғанда ярҙам итә. Шулай уҡ ҡан баҫымын яйға һалыу, аллергиянан арыныу өсөн ҡул­ла­ныла. Бананда В6 витамины күп.


Көҙҙөң “ауы”на эләкмәҫкә финик та ярҙам итә. Билдәле булыуынса, уның яртыһын глюкоза тәшкил итә. Был емеш аҡһымға, А, В1, В2 витаминдарына бай, мейе эшмә­кәрлеге өсөн айырыу­са файҙалы. Финик иммунитетты, һөйәкте, тештәрҙе, күҙ мускулдарын нығыта, организмдың күҙәнәк­тәрен яңырта.


Йөҙөмдөң дә файҙаһы күп. Ул минераль мат­дәләргә бай. Дүрттән бер өлөшө глюкозанан торғанлыҡтан, ауыр физик һәм аҡыл көсөргәнеше кисергән кеше­ләр өсөн айырыуса файҙалы. Йө­ҙөм­дә тимер күп. Медицина белгестәре билдәләүенсә, ул организмда яман шеш барлыҡҡа килеү хәүефен кәметә.


Көҙ күптәр тиҙ арыуға зарланыусан. Бындай осраҡта инжирҙың файҙаһы ҙур, ти белгестәр. Ул физик һәм аҡыл эшенә күп көс һалған кешегә яңы ҡеүәт өҫтәй. Шул уҡ ваҡытта мускулдарға, нервы системаһына ыңғай йоғонто яһай. Инжир минералдарға бай. Емеште даими ҡулланған кеше йөрәк-ҡан тамыр­ҙары ауырыуына зарланмай икән.