Әлшәй хәбәрҙәре
+1 °С
Болотло
Бөтә яңылыҡтар
Рәсми бүлек
29 Август 2018, 12:13

“Компенсация урмандары” шаулап үҫерме?

Дәүләт Думаһы Тәбиғәт ресурстары һәм экология министрлығының ҡырҡылған урман үҫентеләренә тиң майҙанда “йәшел ҡалҡан”ды тергеҙеү тураһында Урман кодексына үҙгәрештәр индергән закон ҡабул итте.

Дәүләт Думаһы Тәбиғәт ресурстары һәм экология министрлығының ҡырҡылған урман үҫентеләренә тиң майҙанда “йәшел ҡалҡан”ды тергеҙеү тураһында Урман кодексына үҙгәрештәр индергән закон ҡабул итте.



Был закон ҡырҡылған, һәләк булған, зыян күргән урмандарҙы тергеҙеүгә, уларҙың файҙалы функ­цияһын һәм биологик төрлөлөгөн, Рәсәйҙең тәбиғәт байлыҡтарын һаҡлауға булышлыҡ итер, тип ниәтләнә депутаттар.

– Беҙ бөтә төр иҡтисад эшмәкәр­лек өсөн урманды тергеҙеү мотлаҡ булырға тейеш тигән ҡағиҙәне урынлаштырҙыҡ. “Урманды ҡайтар­ғыһыҙ юғалтыу” тигән төшөнсә үт­кәндә ҡаласаҡ, – ти Дәүләт Думаһы Рәйесе Вячеслав Володин.

Тәбиғәт ресурстары һәм экология министры Михаил Кобылкин белдереүенсә, инфраструктура проекттары сиктәрендә Рәсәйҙә йыл да урман фондынан яҡынса 145 мең гектарҙа ағас ҡырҡыла, сама менән биш мең гектар ауыл һәм ҡала ерҙәрен киңәйтеүгә күсерелә. Ошоға бәйле, урман фонды 100 мең гектар урманды юғалта. Шуға ла “компенсация урмандары” тураһындағы закон “бер гектар ҡырҡһаң, урынына бер гектар ултырт” тигән ҡағиҙәне индерә. Анығыраҡ әйткәндә, эш алып барған компания алдында ҡырҡылған урман майҙанын ошо уҡ төбәктә тергеҙеү, объектты файҙаланыуға тапшырыу өсөн һаҡлау зонаһын булдырыу бурысы ҡуйыла. Әммә был закон ер аҫты байлыҡтарын геологик тикшергән һәм файҙалы ҡаҙылма ятҡылыҡтарын эшкәрткән, газ, электр линияһы объекттарын файҙаланғандарға ҡағылмай. Граждандарҙың хәүефһеҙлеген тәьмин иткән һаҡлыҡ урындары сигендә һәм барлыҡ иҫәпләнгән эштәрҙе атҡарыу өсөн кәрәкле объекттарҙы файҙаланыу шарттары булдырғандар урман тергеҙеү менән шөғөлләнмәйәсәк.

Бынан тыш, закон урман фондын башҡа төр категорияларға күсергән осраҡта ғына “йәшел ҡалҡан” тергеҙеләсәген күҙ уңында тота. Шулай уҡ урманды ҡырҡҡандан йәки күсергәндән һуң бер йылдан да ҡалмайынса ағас ултыртыу талап ителә. Документҡа ярашлы, тергеҙеү тәбиғи, яһалма йәки ҡат­наш ысул менән алып барыласаҡ.

“Йәшел ҡалҡан”ды тергеҙеү эшен тәьмин итеүҙең айырым тәртибе лә ҡарала. Йәғни бындай осраҡта ағасты тергеҙеү һәм үҫтереү өсөн бирелгән майҙандың торошо (ҡырҡынды, аҡлан, асыҡлыҡ, буш ерҙәр, юл, ауыл-ара һуҡмаҡ, ҡул­ланыу өсөн уңайһыҙ булған һаҙлыҡ, таш һибелмәһе) асыҡланыласаҡ.

Президенттың тәбиғәтте һаҡлау эшмәкәрлеге, экология һәм транспорт һорауҙары буйынса махсус вәкиле Сергей Иванов белдере­үен­сә, ниндәй төрҙәге ағас ҡырҡыл­һа, шундай уҡ төр ултыртылырға тейеш.

– Хәҙер автомобиль, тимер юл, электр тапшырыу линиялары, торба һуҙыусылар, газ линияһы төҙөүселәрҙең барыһы ла эш барышында күпме ағас ҡырҡҡан, шунса үҫенте ултыртырға бурыслы, – ти ул.

Читайте нас: