Әлшәй хәбәрҙәре
+20 °С
Болотло
Бөтә яңылыҡтар
Милли проекттар
20 Февраль 2020, 11:55

Рөхсәтһеҙ сүплектәрҙе юҡ итеүҙе тиҙләтергә кәрәк

“Экология” милли проекты маҡсаттарының береһе – производство һәм файҙаланыу ҡалдыҡтары менән һөҙөмтәле эш итеү, бында шулай уҡ рөхсәтһеҙ сүплектәрҙе юҡ итеү ҙә инә.

Башҡортостанда уҙған йылда муниципалитеттар көсө менән 2 918 рөхсәтһеҙ сүплектең 414-е генә юҡ ителгән, тип хәбәр итте республиканың тәбиғәттән файҙаланыу һәм экология министры урынбаҫары Нияз Фазылов.

Республикала законһыҙ сүп-сар өйөмдәренең дөйөм майҙаны – 2 301 гектар. Ведомство вәкиле һүҙҙәренсә, сүплектәрҙе мөмкин тиклем тиҙерәк юҡ итеү темптарына аҡса етмәй.

Рөхсәтһеҙ сүплектәрҙе юҡ итеүҙең төп ысулы – уларҙы эреләтеү. Йәғни бәләкәй сүплектәрҙәге ҡалдыҡтар ҙурыраҡтарына күсерелә.

Әле Экология министрлығы муниципалитеттарға законһыҙ сүплектәрҙе бөтөрөүгә бәйле дәүләт ярҙамы сараларын күрһәтеү буйынса күрше төбәктәрҙең тәжрибәһен өйрәнә.

Шулай уҡ республикала «Таҙа ил» төбәк проектын бойомға ашырыу барышында ҡала эсендә урынлашҡан бөтә сүплектәр юҡ ителергә тейеш. 2019 йылда Өфөлә һәм Нефтекамала 16 сүплек бөтөрөлгән, Дәүләкән, Благовещен, Сибай, Баймаҡ, Күмертау, Стәрлетамаҡ ҡалаларында алты сүплекте юҡ итеүгә проект документацияһын әҙерләү өсөн дәүләт килешеүҙәре төҙөлгән.

Республиканың тәбиғәтте һаҡлау ведомствоһы мәғлүмәттәре буйынса, әлеге ваҡытта ҡалдыҡтарҙы урынлаштырыу объекттары дәүләт реестрында сүп-сар күмелгән 34 ҡаты коммуналь ҡалдыҡтар полигоны иҫәпләнә.

Фото: mignews.com
Читайте нас: