Лицей халыҡ сәсәне исеменә тап төшөрмәй

Бөгөн бында 980 уҡыусы белем ала, район үҙәгенән тыш, эргә-тирәләге биш ауылдан 95 бала йөрөп уҡый. Улар өсөн көнөнә алты автобус рейсы ойошторола. Былтыр лицей яңы автобуслы булған, бер нисә уҡыу бүлмәһен заманса мультимедиа комплексы менән йыһаз­лан­дырыуға өлгәшкән. Башҡортос­тан­дың дәүләт һәм республика халыҡ­тары телдәрен һаҡлауға һәм үҫте­реүгә йүнәлтелгән дәүләт програм­маһына ярашлы, Мәғариф һәм фән министрлығы тарафынан Башҡорт­остан тарихы һәм мәҙәниәте бүлмә­һенә ошондай комплекс алынған, башҡорт теле һәм информатика кабинеттары ла заманса ҡорамалдар менән йыһазлан­дырылған. Лицей директоры Римма Дәүләткирәева бындай ярҙамдың, һис шикһеҙ, фәнде уҡытыу сифатын яҡшыртыуы һәм уҡыусыларҙа уны үҙләштереүгә ҡыҙыҡһыныуҙың артыуы тураһында белдерҙе.

Лицейҙың башҡорт теле һәм әҙәбиәте уҡытыусыһы Рәсимә Ғайса ҡыҙы Кәримова ла етәксенең һүҙен хупланы һәм был йәһәттән Башҡорт­ос­тан Башлығының инициативаһы менән башланған “Юғары ос!” программаһының ҙур мөмкинлектәр асыуын билдәләне. Ул дәрестәр алып барған башҡорт теле кабинетында һәр уҡыусы тел өйрәнеү буйынса заманса ҡушымталар ҡуйылған планшеттар менән ҡулланыу мөмкинлегенә эйә. Улар ярҙамында балалар телмәр үҫтереү, диалогтар ҡороу менән шөғөлләнә. Шулай уҡ интерактив таҡта һәм башҡа ҡорамалдар видеодәрестәр, төрлө саралар үткәрергә, уҡытыуҙы ҡыҙыҡлы алымдар менән байытырға мөмкинлек бирә, ти мөғәллимә.

М. Буранғолов исемендәге башҡорт лицейында башҡорт теле һәм әҙәбиәтенән алты уҡытыусы белем бирә. Уларҙың һәр береһе – үҙ эшенең оҫтаһы булып танылған тәжрибәле педагог. Мәҫәлән, Миләүшә Хәлил ҡыҙы Муллағәлина, оҙаҡ йылдар инде “Йәйләү” лагеры программаһын ҡулланып, уҡыусыларҙың ялын ойоштороп ҡына ҡалмай, уларҙа тыуған яҡ тарихына ҡарата һөйөү һәм ҡыҙыҡһыныу тәрбиәләй, шулай уҡ ҡул эштәренә өйрәтә. Балаларға бигерәк тә кейеҙ техникаһы оҡшай.

– Йыл һайын көтөп алған Баш­ҡорт теле һәм әҙәбиәте буйынса төбәк-ара олимпиада быйыл онлайн тәртибендә үтте. Бик уңайлы булды. Уҡыусыларыбыҙҙың уңыштарынан ҡәнәғәтбеҙ. Ғөмүмән, беҙ, пандемия шарттарына ҡарамайынса, барлыҡ конкурстарҙа ҡатнашып, алдынғы урындар яулап торабыҙ. Бындай ярыш­тар балаларҙы сәмләндерә, дәртләндерә, – тине лицейҙың баш­ҡорт теле һәм әҙәбиәте уҡытыу­сылары. Быйылғы олимпиадала Айгөл Рәйес ҡыҙы Вәлиеваның ике уҡыусыһы – Камила Байрам­ғолова менән Карина Фәйзуллина, ә Рәсимә Ғайса ҡыҙының бер уҡыусыһы – Ләйлә Әғзәмова призлы урынға лайыҡ булған.

Уҡыусылар башҡорт телен өс төр­лө программа буйынса өйрәнә. Саф башҡорт кластары – уны баш­ҡорт мәктәптәре программаһына ярашлы, икенселәр – туған тел, өсөн­сөләр дәүләт теле булараҡ уҡый.

– Шөкөр, уҡыусыларыбыҙ дәрес­тәргә ҙур теләк менән йөрөй, ата-әсә­ләр яғынан да һәр саҡ аңлау табабыҙ. Уҡыу кабинетын заманса итеп йыһазландырғандан һуң, дәрестәргә ҡарата ҡыҙыҡһыныуҙың да бермә-бер артыуы һиҙелә, – ти Рәсимә Ғайса ҡыҙы.

Былтыр М. Буранғолов исемен­дәге башҡорт лицейында тағы бер мөһим һәм ҡыуаныслы ваҡиға булған – бында стоматология кабинеты асылған. Был башланғыс “Юғарыға ос!” милли мәғариф проектының “Сәләмәт йылмайыу” модулен үҫте­реүгә ярашлы тормошҡа ашырыла.

Уҡыусыларҙы “Ауыл табибы” программаһына ярашлы эшкә ҡайтҡан табип-стоматолог Илдар Смаҡов ҡабул итә. Ул балаларға тештәрҙе дөрөҫ таҙартыу серҙәрен төшөндөрә, гигиена саралары тураһында һөйләй. Стоматология кабинеты асылғас та үткәрелгән беренсе профилактик тикшереү уҡыусыларҙың 90 проценттан ашыуының тештәрен дауаларға кәрәклекте күрһәткән.

Мәғариф усаҡтарындағы бөтә был матур башланғыстар йәш быуынға сифатлыраҡ, төплөрәк белем биреүҙе, бер ыңғайҙан уларҙың сәләмәтлеге тураһында хәстәрлек күреүҙе, йәғни белемле, һау-сәләмәт, төрлө яҡлап үҫешкән лайыҡлы алмаш тәрбиәләүҙе маҡсат итеп ҡуя.