Илһөйәрлек рухы булһын күңелдәрҙә

Күңелендә илһөйәрлек рухы булмаған халыҡ иртәме-һуңмы һәләкәткә дусар, тиҙәр. Иманым камил, беҙгә бындай ҡурҡыныс янамай, сөнки республикабыҙ, районыбыҙ белем усаҡтарында был йәһәттән эҙмә-эҙлекле эш алып барыла, йәш быуында Тыуған илгә һөйөү, ватансылыҡ тойғоһо тәрбиәләү буйынса бихисап күркәм саралар ойошторола.

Күптән түгел Раевка 4-се мәктәбендә үткән “VII Щербаков уҡыуҙары” республика фәнни-ғәмәли конференцияһында ҡатнашыусыларҙың сығыштары ла тарих менән ҡыҙыҡһыныу, ватансылыҡ, милли рух кеүек төшөнсәләр менән һуғарылғайны. Ошо белем усағының 1937 йылғы сығарылыш уҡыусыһы, Советтар Союзы Геройы Павел Федорович Щербаковтың яҡты иҫтәлеген мәңгеләштереү маҡсатында ойошторолған был патриотик сара тәүге тапҡыр 2012 йылда район кимәлендә уҙғарыла. Ә ике йылдан һуң инде ул республика күләмендә үткәрелә башлай.

Быйылғы уҡыуҙар Бөйөк Ватан һуғышында һынылыш осоро булған Сталинград яуының 75 йыллығына һәм Башҡортостандың 100 йыллығына арналды. Сараның пленар өлөшөн асып, унда ҡатнашыусыларҙы район хакимиәте башлығы урынбаҫары З. З. Әхмәтов, мәғариф бүлеге етәксеһе А. Т. Солтанғолов, Мәғариф министрлығы бүлегенең белгес-эксперты Р. Р. Нафиҡова, Башҡорт дәүләт университетының Стәрлетамаҡ филиалы профессоры, филология фәндәре докторы, яҡташыбыҙ И. Е. Карпухин, Башҡортостан мәғарифты үҫтереү институтының уҡытыу-методика эше буйынса проректоры Л. Ф. Шәкүрова ихлас сәләмләне.

Сара сиктәрендә 4-11-се класс уҡыусыларының фәнни-ғәмәли конференцияһы, уҡытыусылар өсөн методик семинар, проза әҫәренән өҙөк һөйләү буйынса конкурс уҙҙы. Конференцияға республикабыҙҙың 15 районынан 250-нән ашыу уҡыусы һәм педагог килгәйне. Ижади эштәр (һүрәттәр, иншалар, видеороликтар) тәҡдим ителгән ситтән тороп үткән этапта өс йәш категорияһында 800-ҙән ашыу бала ҡатнашты. “Щербаков уҡыуҙары”ның пленар өлөшөнән һуң ижади конкурс еңеүселәрен һәм призерҙарын бүләкләү тантанаһы булды.

Уҡыусыларҙың сағыу сығыштарына, һүрәттәр күргәҙмәһенә, ижади проекттарға ҡарап, бындай саралар йәш быуында илһөйәрлек, ватансылыҡ тойғолары тәрбиәләүҙә мөһим урын биләй тип ҙур ышаныс менән әйтергә мөмкин.