Һүндереүгә ҡарағанда иҫкәртеүе еңелерәк

Һуңғы ваҡытта районда янғын сығыуҙар йышайҙы.

Йыл башынан 13 янғын осрағы теркәлде, үткән йылдың ошо уҡ осоро менән сағыштырғанда өскә күберәк. Йорттар, ҡаралты-ҡуралар ғына түгел, автомобилдәр ҙә яна. Ҡыҙғанысҡа ҡаршы, ялҡын кеше ғүмерҙәрен дә аямай. Раевка ауылындағы алты фатирлы йорттоң ике бүлмәле квартираһында ике ир, торлаҡ йортта ике ҡатын-ҡыҙ утта янып һәләк булды.

Фажиғәләрҙең төп сәбәбе - ябай ғына хәүефһеҙлек ҡағиҙәләрен үтәмәү. Мәҫәлән, ут менән һаҡһыҙ эш итеүҙән - өс, дүрт осраҡта - электр ҡорамалдарының төҙөк булмауы, өсөһөндә – мейес һәм төтөн юлдарының дөрөҫ ҡуйылмауы, икеһендә автомобилдәрҙең төҙөк булмауы арҡаһында янғын сыҡты.

Янғын сыҡҡан осраҡта:

01, 112 телефондары аша янғын һүндереүселәрҙе саҡырығыҙ;

улар килгәнсе өйҙән кешеләрҙе һәм мөлкәтте сығарығыҙ;

ҡул аҫтындағы әйберҙәр менән утты һүндереү һәм зыян күреүселәргә тәүге медицина ярҙамы күрһәтеү саралары күрегеҙ.

Хәтерегеҙҙә тотоғоҙ, янғынды һүндереүгә ҡарағанда, иҫкәртеүе еңелерәк!

62-се янғын часы етәксеһе.