“Китапханалар төнө” - яңы форматта

25 апрелдә үҙәк китапхана сайтында, ауыл китапханаларының социаль селтәрҙәге төркөмдәрендә сараларҙың трансляцияһы буласаҡ.

Үҙәк китапхана сәғәт 11-ҙә башланасаҡ «Мин һеҙгә һуғыш тураһында һөйләйем” темаһына онлайн хәтирәләр кисәһенә саҡыра.Осрашыуҙа һәр бер ҡатнашыусы тура эфирҙа фотолар, электрон презентациялар, илебеҙҙең Алтын фондына ингән нәфис һәм документаль фильмдарҙан өҙөктәр ҡарай ала.

Балалар китапханаһы ла ҡыҙыҡлы һәм мауыҡтырғыс программа әҙерләгән. Йәш китап уҡыусыларҙы М. Кәримдең “Беҙҙең өйҙөң йәме” китабы буйынса эшләнгән буктрейлер презентацияһы, “Артиллеристар - һуғыш Аллаһы”, “Әлшәйҙең герой артиллеристары” тарихи-танып-белеү дайджестары, “Беҙ – артиллеристар” темаһына хикәйәләр һәм шиғырҙар менән танышыу көтә. Трансляциялар httр://vk.com/id329395875 һылтанмаһы буйынса 15 сәғәттә башлана.

“Бәйләнештә” селтәрендә ауыл китапханалары шулай уҡ бик күп ҡыҙыҡлы саралар: шиғриәт сәғәттәре, мауыҡтырғыс уйындар, викториналар әҙерләгән. Аксен моделле китапханаһына йөрөүселәр М. Шолоховтың “Кеше яҙмышы” әҫәре буйынса китап уҡыусылар конференцияһында ҡатнаша ала. Ташлы ауылы китапханаһы үҙенең уҡыусыларын герой яҡташыбыҙ Хәниф Мөхәмәтовҡа һәм 112-се кавалерия дивизияһы составына ингән яугир ауылдаштарына бағышланған “Ауылым тарихында һуғыш” медиапрезентацияһын ҡарарға саҡыра.

Ибрай ауылы китапханаһы һуғыш ветеранының тол ҡатыны, 103 йәшлек М. Солтангәрәева менән осрашыуҙан “Еңеүҙең тере тауышы” тип аталған видеояҙма тәҡдим итә.

Ҡыҙыл ауылы китапханаһына йөрөүселәр “Китап беҙгә һуғыш тураһында иҫтәлек ҡалдыра” филвордын сисеүҙә ҡатнаша ала. Ҡармыш ауылы китапханаһы “Бәйләнештә” селтәрендә үҙенең уҡыусыларын “Мин хәтерләйем һәм ғорурланам” әҙәби-танып белеү викторинаһына саҡыра.

Шулай уҡ Воздвиженка ауыл китапханаһының һуғыш темаһына арналған виртуаль күргәҙмәһе менән танышырға, Ниғмәтулла, Шафран ауылдары китапханаларының онлайн форматтағы шиғриәт кисәләрендә, Казанка ауылы китапханаһының “Һуғыш тураһында уҡыйбыҙ һәм һүрәт төшөрәбеҙ” темаһына балалар ижады конкурсында ҡатнашырға мөмкин.

Яңы форматта үткәрелгән сараларҙа әүҙем ҡатнашырға саҡырабыҙ.

Луиза АҪЫЛГӘРӘЕВА,

үҙәк китапхананың методика-библиография бүлеге мөдире.