Бөтә яңылыҡтар
Иғтибар
14 Август 2018, 11:51

Сүп-сар өсөн бөтәбеҙгә лә түләргә тура киләсәк

2019 йылдың 1 ғинуарынан “Етештереү һәм ҡулланыу ҡалдыҡтары тураһында”ғы федераль законға төҙәтмәләр ғәмәлгә инәсәк.

Улар ғәмәлдә коммуналь көнкүреш ҡалдыҡтары менән эш итеүҙең яңы системаһына күсеүҙе аңлата.

Һүҙ сүп-сар йыйыу һәм сығарыу тураһында бара. Яңы йылдан был хеҙмәт түләүле һәм бөтәһе – граждандар, юридик шәхестәр, барлыҡ ауылдарҙағы эшҡыуарҙар өсөн дә мотлаҡ үтәлергә тейешле хеҙмәт буласаҡ. Ә көнкүреш ҡалдыҡтарын йыйыу, транспортировкалау, сорттарға айырыу һәм утилләштереү менән махсус ойошмалар – төбәк операторҙары шөғөлләнәсәк. Башҡортостанда биш зонаға дүрт төбәк операторы билдәләнде.

- Әлшәй районы 4-се зонаға инә, аукцион һөҙөмтәләре буйынса беҙҙе Туймазынан “Экология Т” компанияһы хеҙмәтләндерәсәк, - тип аңлатты район хакимиәтенең торлаҡ-коммуналь хужалығы мәсьәләләре буйынса баш белгесе Альбина Сәлихова. – Төбәк операторы хеҙмәттәре суммаһын республиканың Тарифтар буйынса дәүләт комитеты раҫлаясаҡ, көнкүреш ҡалдыҡтарын алып киткән өсөн түләү квартирала йәки йортта теркәлгән кешеләр һанына ҡарап иҫәпләнәсәк.

Законға үҙгәрештәр индереүҙең төп маҡсаты – ойошҡан рәүештә көнкүреш ҡалдыҡтарын йыйыу, ташыу, ә иң мөһиме - эшкәртеү юлы менән йыйылып ятҡан сүп-сарҙың тирә-яҡ мөхиткә һәм кешеләр һаулығына насар йоғонтоһон кәметеү.


Читайте нас в