Бөтә яңылыҡтар
Файҙалы кәңәштәр
13 Июнь 2019, 17:16

Туҡлыҡлы ла, файҙалы ла ҡорот

Иң боронғо тәғәмебеҙ - ҡорот.

Ифрат шифалы ризығыбыҙ ҡороттоң файҙалы яҡтары һанап бөткөһөҙ. Ул аҡһымға, углеводтарға, төрлө ферменттарға, микроэлементтарға, витаминдарға бай.

Ҡорот менән ашағанда, майлы аш та ҡурҡыныс түгел. Һалҡын тейгәндә ҡоротлап-борослап эҫе һурпа эсеү тирләтә, хәл индерә. Күңел болғанғанда, аҙ ҡанлылыҡтан, ауырыуҙан хәлһеҙләнгәндә лә ярҙам итә, аппетитты аса, көс-ҡеүәт бирә. Элек ҡышын урманға ҡорот менән ҡаҙы алып йөрөр булғандар – туҡлыҡлы ла, файҙалы ла ризыҡтарыбыҙ һалҡынға бирешмәҫкә көс биргән. Ҡороттоң үҙе генә түгел, эркет һыуы ла ифрат шифалы. Ул ашҡаҙанды таҙарта. Кендек инәләре борон был һыу менән яңы тыуған бәпестең кендеген эшкәрткән. Ҡуйы булып үҫһен, йылҡылдап торһон өсөн, һылыуҙар сәсен йыуған. Эркет һыуы менән баҫҡан ҡамыр ҙа уңмай ҡалмай.
Борон ҡорот ҡайнатмаған ҡатын-ҡыҙ булмағандыр. Әммә бөгөн был шифалы ризығыбыҙҙы әҙерләү серҙәрен һәр кем белеп бөтмәй. Йәштәр ҙә ҡорот әҙерләү менән ҡыҙыҡһына. Шуға ла бөгөн ҡорот ҡайнатыу серҙәре менән уртаҡлашабыҙ.


Ҡаймағы айыртылған һөттө ҡайнатабыҙ ҙа йылымыс булғансы һыуытабыҙ. 2 биҙрә һөткә 0,7 литр самаһы ҡатыҡ ойотҡоһо һалабыҙ. Әлеге йәйге эҫе көндә ул кискә тиклем ойоп та сыға. Бер нисә көндән, әсегәс, ҡатыҡты ҡайнатабыҙ. Ҡайнағас, эмалле биҙрәгә ҡойоп һыуытабыҙ. Туҡыма тоҡтарға һалып, һарҡытырға ҡуябыҙ. 1-2 көндән эркете ағып бөтә. Ҡоротто алып, самалап тоҙ һалабыҙ ҙа баҫабыҙ. Йоҙроҡ ҙурлығында йомарлайбыҙ.
Йәш ҡорот әҙер. Уны ошо килеш кенә ашарға ла, киптерергә лә, туңдырғысҡа һалып һаҡларға ла мөмкин.

*Әнис (укроп), петрушка, йәшел һуған менән туңдырһаң, ашҡа һалырға йәтеш.
*Тәме оҡшаһа, ҡатыҡты ҡайнатҡанда ҡарағат йә сейә япрағы һалып ебәрергә мөмкин (аҙаҡтан уны алабыҙ).


*Ҡорот файҙалы һөт аҡһымдарына бай, унда углеводтар, ферменттар, микроэлементтар, витаминдар бар. Ул бик калориялы аҙыҡ, 100 грамм ҡоротта 260 ккал.