Бөтә яңылыҡтар
Файҙалы кәңәштәр
7 Март 2018, 11:24

Ашығыҙ тәмле булһын!

“Кәләш” салаты Ҡатлы салат йомшаҡ булһын өсөн продукттарҙы ҡабымлыҡ өҫтөндә генә ҡырғыстан үткәрәбеҙ.

“Кәләш” салаты
300 г ыҫланған тауыҡ ите, 4 йомортҡа һәм бешкән бәрәңге, 1 ҡап йомшаҡ сыр, һуған (ваҡ итеп турарға һәм 10-20 минутҡа аш һеркәһе һәм ҡайнар һыу ҡатнашмаһына һалырға), йәшел һуған да ярай, майонез.
Ҡатлы салат йомшаҡ булһын өсөн продукттарҙы салаттың өҫтөндә генә ҡырғыстан үткәрәбеҙ.
1-се ҡат: ваҡлап туралған тауыҡ ите (ыҫланған итте ҡыҙҙырылған йәки бешкәне менән дә алмаштырырға мөмкин), майонез
2-се ҡат: һуған
3-сө ҡат: эре ҡырғыстан үткәрелгән картуф, майонез
4-се ҡат: ваҡланған йомортҡа һарыһы
5-се ҡат: ваҡ ҡырғыстан үткәрелгән йомшаҡ сыр
6-сы ҡат: ҡырғыстан үткәрелгән йомортҡа ағы.
Салатты табынға бирер алдынан бер нисә сәғәткә ҡалдырып торорға.

Емеш эслеге менән бәлеш

Яртышар стакан ҡаймаҡ һәм шәкәр ҡомон ҡушып, 150 г йомшартылған аҡ май өҫтәргә, 2 стакан он, 1 сәй ҡалағы йомшартҡыс (разрыхлитель) һалырға. Ҡамыр баҫып, уны тәрән табаға йәйергә.

Эслек өсөн: 1 йомортҡаға 1 стакан шәкәр ҡомо, 2 аш ҡалағы он һәм 1 стакан ҡаймаҡ ҡушып бутарға. Туңдырылған ҡурай еләген ҡамыр өҫтөнә йәйеп, эслекте һалырға. Духовкала (180 градус) бешерергә.

***

2 йомортҡаны 1 стакан шәкәр ҡомо менән күпертеп бутарға, 1 стакан һөт, ярты стакандан аҙыраҡ көнбағыш майы, ванилин, 1 сәй ҡалағы сода һалып, он өҫтәргә һәм ҡаймаҡ ҡуйылығында ҡамыр әҙерләргә. Ҡамырҙы майланған һәм он һибелгән табаға һалғас, өҫтөнә емештәр (туңдырылғаны ла ярай) теҙәбеҙ. 180 градусҡа тиклем ҡыҙҙырылған духовкала 30 минут самаһы бешерергә.

Читайте нас в