Халыҡты эш менән тәьмин итеү үҙәге дистанцион рәүештә эшләй

Күптәр социаль селтәрҙәрҙә бөгөнгө хәлдә үҙәккә нисек мөрәжәғәт итергә, тигән һорау бирә.

- Коронавирусҡа бәйле, республиканың мәшғүллек үҙәктәрендә, шул иҫәптән беҙҙә лә, шәхси ҡабул итеүҙәр туҡтатылды, - тип хәбәр итте халыҡты эш менән тәьмин итеү буйынса Көньяҡ-көнбайыш район-ара үҙәгенең Әлшәй районы буйынсаа бүлеге етәксеһе Венера Хәмиҙуллина.

- Беҙ граждандарҙан уларға эш эҙләүҙә ярҙам итеү һәм киләсәктә уларҙы эшһеҙ тип таныу өсөн дистанцион режимда Башҡортостан Республикаһының Халыҡты эш менән тәьмин итеү хеҙмәтенең интерактив порталы аша ғаризалар ҡабул итәбеҙ. Бының өсөн һеҙгә дәүләт хеҙмәттәре сайтында теркәлергә кәрәк.

- Венера Фәнүр ҡыҙы, әгәр ҙә кеше интернеттан ҡуллана белмәһә, ул ваҡытта ни эшләргә?

- Беҙҙә иҫәптә торған әлшәйҙәрҙе 2-34-83, 2-34-84, 2-34-85 телефондары аша мөрәжәғәттәре буйынса яңынан теркәү үткәрәбеҙ. Эш ваҡытында башҡа һорауҙар менән дә шылтырата алаһығыҙ, аңлатмалар бирергә тырышырбыҙ.