Туған тел

Аҡ юл теләп ҡалам юлсыларға,
Һәр кемгә лә бәхет теләйем.
Яңылыш һүҙ әйтермен,тип ҡурҡмайым-
Мин бит үҙ телемдә һөйләйем!

Балаларым белә туған телде,
Ейәндәрем һөйләй шул телдә!
Үҙ телен ихтирам иткәндәрҙе
Башҡалар ҙа ҙурлай һәр ерҙә.

Туған телем,мотлаҡ һинең аша
Үткәндәргә барып урайым!
Үткәндәрҙе һөйләй риүәйәттәр,
Үткәндәрҙе көйләй ҡурайым.

Тын да алмай тыңлап торғаным бар
Мең аһәңле халҡым йырҙарын...
Әлдә Башҡортостанда йәшәйем!
Әлдә башҡорт булып тыуғанмын!

Туған телем!
Башҡорт телем минең!
Ғүмерле бул,берүк,ғүмерле...
-Хәлдәр нисек?
Һаумы ,туғаным!-тип,
Миңә өндәшәләр түгелме!?.

Гөлнур ҒИЗЗӘТУЛЛИНА.