Өсмөйөшлө фронт хаттары

Ошо мөһим ваҡиғаға бәйле, Рәсәй Федерцияһы Оборона министрлығы “Хәтер юлы” тип аталған проектты бойомға ашыра.

Олатайҙарыбыҙ һәм ҡарт олатайҙарыбыҙҙың фронттан ебәргән хаттары “Хәтер юлы” берҙәм архивына инәсәк һәм һуңынан тарихи альбом сығарыласаҡ. Сканерланған текстарҙы йәки фотоға төшөрөлгән хаттарҙы Пионерҙар йортоноң naday03@mail.ru йәки zilja.zalilova@bk.ru электрон почтаһына ебәреүегеҙҙе һорайбыҙ.

Хат тексы аңлайышлы һәм тулыһынса төшөрөлгән булырға, адрестың, хаттың кемгә һәм кем тарафынан ебәрелеүе асыҡ күренергә тейеш. Уны Пионерҙар йортонда ла сканерларға мөмкин.

Һәр ғаиләгә фронттан килгән һалдат хаттары ул йылдарҙың мөһим тарихи документы булып тора. Уларҙы түҙемһеҙләнеп көтөп алып бөтә ғаилә менән уҡығандар, дуҫтарына һәм күршеләренә лә уҡып ишеттергәндәр. Дары эҫе һеңгән хат юлдарында - һуғыш, окоптарҙағы ғәҙәти көндәр һулышы һәм еңеүгә ышаныс!

Уларҙың күбеһе - “Цензура тарафынан тикшерелгән” штампы ҡуйылған ябай өсмөйөшлө хаттар. Икенселәре – икегә бөкләнгән ябай ҡағыҙ бите. Өсөнсөләре ялан почтаһы битендә һуғыштар араһында ашығыс эре почерк менән яҙылған, ә бланкында “Тулыһынса юҡ иткәнгә тиклем эҙәрлекләргә!”, “Фашист илбаҫарҙарына үлем!” тигән һүҙҙәр бар.

Пионерҙар йорто музейында 1943 йылдың 1 майында яҙылған хат ҡәҙерләп һаҡлана. Уны фронттан Ғәзиз Ғәлиәхмәт тулы Абдуллин ҡатынына һәм балаларына яҙған:” Ҡәҙерле Хәтимә! Һиңә ялҡынлы сәләм ебәрәм. Шулай уҡ Ленаға, Клараға, Верочкаға һәм Ринатҡа күп сәләм. Хөрмәтле өләсәйебеҙгә, Варяға, Надяға ла күп сәләм, иптәш Семеновҡа һәм Нәбиуллинға ла сәләм әйтерһең. Юлда барғанда мин бынан өс хат яҙып ебәрҙем, уларҙы алғанһыңдыр тип өмөтләнәм. Бына мин йәнә Бөйөк Ватан һуғышы ҡырҙарында, бында мин өҫтәмә белем һәм көс-ҡеүәт туплап килдем. 30 апрелдә үҙебеҙҙең часта булдым, иптәштәр бик яҡшы ҡаршы алдылар. Бөгөн 1 майҙы байрам иттек, митинг булды”.

1943 йылда Ғәзиз Ғәлиәхмәт улы утлы Курск дуғаһына эләгә. Уға ул ваҡытта 35 йәш була.

Фронттан килгән был өсмөйөшлө хаттар ауыр һуғыш йылдары символы булып бик күп быуындарҙың хәтерендә ҡалһын һәм йөрәктәребеҙгә ғорурлыҡ тойғоһо өҫтәһен.

Зилә ЙӘЛИЛОВА,

Пионерҙар йорто педагогы.