Бөтә яңылыҡтар
Ауыл хужалығы
19 Ноябрь 2020, 18:00

Башҡорт бал ҡортон һаҡлау маҡсатында

Башҡортостандың Умартасылыҡ һәм апитерапия буйынса фәнни-тикшеренеү үҙәге тарафынан Мәғариф һәм фән министрлығы ярҙамы менән «Башҡорт бал ҡорто» республика балалар ижады конкурсы үткәрелде.

«Апимондия» халыҡ-ара умартасылыҡ ассоциациялары федерацияһының 47-се конгресына арналған сара дистанцион рәүештә үтте. Башҡорт бал ҡортон һаҡлап ҡалыу проблемаһына иғтибарҙы йәлеп итергә теләгән ойоштороусылар саҡырыуына бөтә республиканан педагогтар, тәрбиәселәр һәм бер йәштән 14 йәшкә тиклем балаларҙың ата-әсәләре ҡушылды.

Конкурсҡа 1200-ҙән ашыу эш - рәсемдәр, шиғырҙар, әкиәттәр, хикәйәләр, эшләнмәләр, видеолар, презентациялар һәм хатта китаптар ебәрелгән. Еңеүселәр һәм призерҙар араһында Әлшәй мәктәбе уҡыусыһы ла бар. Ҡырым мәктәбенән туғыҙ йәшлек Румина Асфина "Әкиәттәр" номинацияһында икенсе урын яуланы. Дүртенсе синыф уҡыусыһы конкурсҡа «Ҡортҡай» һәм «Роза һәм бал ҡорто» (уҡытыусыһы Зөлфиә Салауат ҡыҙы Мөхәррәмова) әкиәттәрен ебәргән.

Фәнүзә СУФИЯНОВА.

Читайте нас в